स्पेनको गोदाममा विस्फोट, ३ जनाको मृत्यु

काठमाडौं । स्पेनको दक्षिणपूर्वी शहर इबीमा रहेको कारखानामा बुधबार भएको विष्फोटमा परी तीन जनाको मृत्यु भएको छ भने तीन जना गम्भीर घाइते भएका छन् । भ्यालेन्सिया क्षेत्रका लागि स्पेनी सरकारी प्रतिनिधि पिलार बर्नाबेले एलिसेन्टेबाट करिब ३५ किलोमिटर टाढा इबीको इन्डस्ट्रियास क्लाइम्बर कारखानामा भएको विस्फोटमा मृत्यु भएको पुष्टि गरेको अन्तर्राष्ट्रिय सञ्चार माध्यमले जनाएको छ ।

बेर्नाबेले विष्फोट हुँदा भवनको छाना र पर्खालको केही भाग भत्किएको र धेरै मानिस भग्नावशेषमा फसेको बेला भवनमा ३९ जना रहेको बताए । मृतकका साथै, विस्फोटबाट तीन जना गम्भीर घाइते भएका छन् र उनीहरूलाई नजिकैको एलिसेन्टे, भ्यालेन्सिया र अल्कोयका अस्पतालहरूमा लगिएको छ । विस्फोटमा परी थप तीन जना सामान्य घाइते भएका छन् । अधिकारीहरूले विस्फोटको कारणको लागि अनुसन्धान सुरु भएको बताएका छन् ।