लगातार दुई दिनको करेक्सनपछि शेयर बजारमा सुधार, १० अर्ब ५४ करोडको कारोबार

काठमाडौं । लगातार दुई दिनको करेक्सनपछि सोमबार शेयर बजारमा सुधार देखिएको छ । यस दिन शेयर बजार परिसूचक नेप्से १९.९७ विन्दुले बढेर २७५८.०४ अंकमा अडिएको छ ।

यस दिन नेप्से परिसूचकसँगै कारोबार रकम पनि बढेको छ। सुधारिएको बजारमा आज १० अर्ब ५४ करोड रुपैयाँभन्दा बढीको शेयर कारोबार भयो । गत कारोबार दिन अर्थात् आइतबार आठ अर्ब ८३ करोडको शेयर कारोबार भएको थियो ।

आज १२६ कम्पनीको शेयर मूल्य बढेको छ भने ११२ वटाको घटेको छ। यस्तै छ कम्पनीको स्थिर रहेको छ। 

यस दिन पाँच कम्पनीको सकारात्मक सर्किट लेबलमा कारोबार भएका छन् । विशाल बजार, तारागाउँ रिजेन्सी र खानी खोला हाइड्रोपावरको मूल्य १० प्रतिशतका दरले बढेको छ भने जोशी हाइड्रोपावरको मूल्य ९.९९ प्रतिशतले बढेको छ।

आज नेपाल फाइनान्सको मूल्य सर्वाधिक ८.७२ प्रतिशतले घटेको छ । दोस्रोमा गुराँस लघुवित्तको मूल्य ७.७३ प्रतिशतले घटेको छ । 

सोमबार नेपाल फाइनान्सको सर्वाधिक कारोबार भएको छ। आज कारोबारमा आएका १३ वटा समूहगत परिसूचकमध्ये नौ समूहको परिसूचक बढेका छन् भने बाँकी चार समूहको परिसूचक घटेको छन्।