करिब १ सय ७५ किलोग्राम गाँजासहित दुई जना पक्राउ

काठमाडौं । हेटौँडा उपमहानगरपालिका-१५ रातोमाटे चेक प्वाईन्टबाट अवैध लागुऔषध गाँजा करिब १ सय ७५ किलोग्रामसहित २ जनालाई प्रहरीले पक्राउ गरेको छ ।

पक्राउ पर्नेहरूमा बकैया गाउँपालिका–४ बस्ने २४ वर्षीय सुमन लामा र हेटौँडा उपमहानगरपालिका–११ कालिदमार बस्ने २४ वर्षीय सुशील भोलन रहेका छन् ।

प्रहरी चौकी रातोमाटेबाट खटिएको प्रहरी टोलीले हेटौँडाबाट पथलैयातर्फ जाँदै गरेको बा.प्र.०३-००१ च १५८४ नम्बरको पिकअप गाडीलाई जाँच गर्ने क्रममा उक्त परिमाणको गाँजा फेला पारी चालक सुमन र गाडीमा सवार सुशीललाई बुधबार दिउँसो पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको छ ।