बुद्धले थप्यो १९ औँ एटीआर जहाज

काठमाडौं । वायुसेवा कम्पनी बुद्ध एयरले १९औँ एटीआर जहाज भित्र्याएको छ । बुद्धले आज ल्याएको नयाँ जहाज एटीआर–७२ हो ।

यससँगै एटीआर–७२ जहाजको संख्या १६ पुगेको छ । नयाँ जहाजको आवश्यक कागजी प्रक्रिया पुर्‍याई डिसेम्बर महिनाको अन्त्यबाट उडान सेवामा ल्याईने बुद्ध एयरले जनाएको छ ।

बुद्ध एयरले कल साईन 9N-AOG जहाज फ्रान्सको एटिआर कम्पनी, तुलुसबाट भित्र्याएको छ ।

बुद्ध एयरसँग ३ वटा एटिआर–४२–३२० र १६ वटा एटीआर–७२–५०० जहाजहरु रहेका छन् । बुद्ध एयरले केही समय अगाडी मात्रै एउटा एटीआर–४२–३२० जहाजलाई उडानबाट विदाई गरेको थियो । त्यस जहाजको डिरजिष्ट्रेशन प्रक्रियामा रहेको छ ।

हवाई उडानलाई सहज र सरल बनाउने प्रतिवद्धता अनुरुप बुद्ध एयर आफ्नो बेडामा नयाँ जहाज थप गरेको हो । बुद्ध एयरका बजार निर्देशक रुपेश जोशीले– ‘सहज भाडासँगै उडान संख्या उल्लेख्य वृद्धि भए अनुरुप यात्रुहरु आफ्नो समय अनुकल उडान भर्न सक्ने’ जनाएका छन् । ‘हामी उडान तालिकालाई बढिसे बढि प्रभावकारिकाताका साथ सञ्चालन गर्न प्रतिवद्ध रहेका छौँ,’ उनले थपे ।

थपिएको जहाजले नियमित मर्मत सम्भारमा पनि सहयोगी हुने कम्पनीले जनाएको छ ।

बुद्ध एयरले आन्तरिकतर्फ अहिले दैनिक १४० भन्दा बढि उडान भरिरहेको छ । अन्तरराष्ट्रियतर्फ काठमाडौंबाट भारतको वाराणसी साताको ३ दिन उडान भरिरहेको छ । यसैगरि पोखराबाट चितवन, भैरहवा तथा नेपालगञ्जको उडान पनि भरिरहेको छ ।