एक जित र ६ हारको नतिजा व्यहोर्दै लुम्बिनीको एनपीएल यात्रा समाप्त, कर्णालीको प्लेअफ सम्भावना कायमै

काठमाडौं । नेपाल प्रिमियर लिग (एनपीएल) २०२४ को आफ्नो अन्तिम खेलमा पनि लुम्बिनी लायन्स पराजित बनेको छ । कीर्तिपुरस्थित त्रिवि क्रिकेट मैदानमा आज शुक्रबार भएको खेलमा कर्णालीसँग लुम्बिनी पाँच रनले पराजित बनेको हो ।

१२९ रनको लक्ष्य पाएको लुम्बिनीले निर्धारित २० ओभरमा सात विकेट गुमाएर १२३ रनमात्र बनाउन सक्यो । योसँगै लुम्बिनीले प्रतियोगिताका सात खेलमा एक जित र ६ हारको नतिजा व्यहोर्नु परेको छ । आजको जितसँगै कर्णालीले भने आफ्नो प्लेअफ सम्भावनालाई बलियो बनाएको छ । ६ खेलबाट आठ अंक जोडेको कर्णाली तालिकाको तेस्रो स्थानमा उक्लिएको छ ।