सुनसरीबाट १ सय ९० किलो गाँजा बरामद

काठमाडौं । सशस्त्र प्रहरी बलले सुनसरीबाट १  सय ९० किलो गाँजा मंगलबार बरामद गरेको छ ।  जिल्लाको धरान उप-महानगरपालिका–१३ शिवधारा स्थित कोशी लोकमार्गबाट उक्त परिमाणको गाँजा बरामद गरेको हो ।

भेडेटारबाट धरानतर्फ आउँदै गरेको बा १० च ६८५२ नम्बरको सुजुकी कारको डिक्कीमा प्लाष्टिकले प्याकिङ गरी ल्याउँदै गरेको उल्लेखित परिमाणको गाँजा सशस्त्र प्रहरी बल, नेपाल सुरक्षा वेश धरानले बरामद गरेको हो । 

चेकजाँचका लागि रोक्ने क्रममा चालक सडकमा कार छाडेर फरार भएका छन् । सोही कारलाई पछ्याउँदै आएको को ३५ प २०४५ नम्बरको मोटरसाईलकमा सवार २ जनालाई पनि गाँजा तस्करीमा संलग्न रहेको शंकास्पद अवस्थामा देखिएपछि प्रहरी बलले नियन्त्रणमा लिइएको छ ।

बरामद गाँजा, कार, मोटरसाइकल र व्यक्तिलाई आवश्यक कारबाहीको लागि सम्बन्धित निकायमा बुझाइएको प्रहरीले जनाएको छ ।