सुदूरपश्चिम प्रदेशका आर्थिक मामिला राज्यमन्त्री बम सवार गाडी भारतमा दुर्घटना, तीन जना घाइते

काठमाडौं । सुदूरपश्चिम प्रदेशका आर्थिक मामिला राज्यमन्त्री प्रकाश बम सवार गाडी भारतमा दुर्घटना हुँदा उनीसहित तीन जना घाइते भएका छन् । राज्यमन्त्री बम सवार प्रदेश ३–०१–०२४ च नम्बरको कार भारतको पलिया बजार नजिक भारतीय नम्बरको कारसँग ठोक्किँदा उनीसहित उनकी श्रीमती कल्पना बम र सहयोगी पदम देउवा घाइते भएको कैलाली जिल्ला प्रहरी कार्यालयले जनाएको छ ।

भारतको खिरी जिल्लास्थित पलिया बजारमा उपचारपछि फर्किँदा दुर्घटना भएको राज्यमन्त्री बमका भतिजा धनबहादुर बमले जानकारी दिए । जिल्ला प्रहरी कार्यालय कैलालीका प्रहरी निरीक्षक दर्शन खड्काका अनुसार, दुर्घटनामा राज्यमन्त्री बमको मुख र नाकमा चोट लागेको छ ।

यस्तै उनकी श्रीमती कल्पना बमको छातीमा र सहयोगी पदम देउवाको टाउकोमा चोट रहेको छ । उनीहरूको धनगढीस्थित निसर्ग अस्पतालमा उपचार भइरहेको प्रहरीले जनाएको छ ।