काठमाडौं । नेपाली कांग्रेस कोशी प्रदेशका सभापति एवं पूर्व मुख्यमन्त्री उद्धव थापामाथि आक्रमण गर्ने ३ जनालाई प्रहरीले पक्राउ गरेको छ ।
पक्राउ पर्नेहरुमा झापाको शिवसताक्षी नगरपालिका–११ का भक्तबहादुर कटुवाल र कनकाई नगरपालिका–३ का पृथ्वी श्रेष्ठ र अर्का एक जना विद्युत प्राधिकरणका सवारी चालक रहेको प्रहरीले जनाएको छ । जिल्ला प्रहरी कार्यालय झापाका प्रमुख एसपी मिलन केसीले उनीहरुलाई पक्राउ गरी आवश्यक अनुसन्धान भइरहेको जानकारी दिए ।
थापामाथि शनिबार साँझ गृहजिल्ला झापाको कनकाईस्थित जामुनबारीमा हातपात भएको थियो । हातपातमा परि उनको आँखा सुन्निएको छ भने मुखमा सामान्य चोट लागेको छ । थापा बा १ झ ६५३ नम्बरको गाडीमा सवार रहेका थिए । भने आक्रमण गर्ने समूह बा १ झ १८७० नम्बरको गाडीमा रहेका थिए ।
उनीहरुले भीआईपी गाडीलाई साइड नदिएको र ओभरटेक गर्ने क्रममा विवाद भएको थियो । सो क्रममा थापाले आफ्नो परिचय दिएपछि उनीहरु थप आक्रामक भएका थिए । थापाको पीएसओले गाडी रोकेरै साइड दिन आग्रह गरेका थिए । तर ती चालकसहितका व्यक्तिहरु गाली गर्दै उनीमाथि आक्रमण गरेका थिए ।
यो खबर पढेर तपाईलाई कस्तो महसुस भयो ?
प्रतिक्रिया