प्रचण्डको तेह्रथुम भ्रमण : चोत्लुङ पार्कको अवलोकन, शहीद परिवारको घरमा खाना

तेह्रथुम । पूर्वप्रधानमन्त्री एवं नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल ‘प्रचण्ड’ले तेह्रथुमको लालीगुँरास नगरपालिकास्थित वसन्तपुरमा रहेको चोत्लुङ पार्कको अवलोकन गरेका छन् ।

रैथाने वास्तु शैलीमा निर्माण गरिएको पर्यटकीयस्थल चोत्लुङ पार्कको दाहालले आज अवलोकन गरेका हुन् । पार्कको अवलोकनपछि उनले कङ्क्रिटको प्रयोग नगरी परम्परागत शैलीमा निर्माण गरिएको चोत्लुङ पार्कको प्रशंसा गरे ।

लालीगुराँस नगरपालिकाको पहलमा निर्माण सुरू गरिएको पार्कमा युमा सङ्ग्रहालय पनि रहेको छ । पार्क एक सय रोपनीभन्दा बढी क्षेत्रफलमा फैलिएको लालीगुराँस नगरपालिकाका नगरप्रमुख अर्जुन माबुहाङले बताए ।

त्यस्तै प्रचण्डले तेह्रथुमको लसुनेमा शहीद परिवारसँग समेत भेटघाट गरेका छन् ।

उपमहासचिव वर्षमान पुन ‘अनन्त’ सहित त्यहाँ पुगेका उनले लसुनेस्थित धनरुपा कार्कीको घरमा पुगेर शहीद परिवारसँग भेटघाट गरेका हुन् । साथै प्रचण्ड लगायत माओवादी नेताहरुले त्यहीँ खाना समेत खाएका थिए ।