भ्रम फैलाएर जनतामा निराशाको खेती नगर्न प्रचण्डलाई सांसद गिरीको आग्रह

काठमाडौं । नेकपा (एमाले) का सांसद पदम गिरीले सरकारले ल्याएको अध्यादेशबाट आम नागरिक खुसी भएको भन्दै प्रतिपक्षी दलहरू दुःखी हुनुपर्ने कारण नरहेको बताएका छन् ।  

आइतबार प्रतिनिधि सभाको बैठकमा बोल्दै सांसद गिरीले अध्यादेशबारे प्रतिपक्षी दलका नेता पुष्पकमल दाहालले संसदको रोष्टमबाट भ्रमको तुवाँलो छर्ने काम गरेको बताए । 

जनतालाई भ्रम फैलाएर निराशाका खेती नगर्न उनले आग्रह गरे । उनले नागरिक, व्यवसायी सबैले अध्यादेशको समर्थन गरेको भन्दै उनले अध्यादेशको विरोध गरेर कसको सेवा गर्न खोजेको ? भन्दै प्रश्नसमेत गरे । अध्यादेशबाट डुब्न लागेका उद्योगहरू माथि उठ्ने विश्वास व्यापारीहरूले गरेको समेत उनको भनाइ छ । 

उनले देशको प्रधानमन्त्रीमाथि विना तथ्य बजारमा उठेका र नियोजित विषयलाई उठाएर बदनाम गरिएको भन्दै त्यसमा नलाग्न आग्रह गरे ।