असोजमा बाढीपहिरो गयो, सरकारले अझै गरेन क्षतिको आँकलन

काठमाडौं । गृहमन्त्री रमेश लेखकले गत असोजमा बागमती, कोशी प्रदेश लगायतका ठाउँमा अविरल बर्षापछि आएको बाढी, पहिरो र डुबानबाट भएको क्षतिको विस्तृत क्षति आँकलन तत्काल अघि बढाउने बताएका छन् ।

बिहीबार सिंहदबारमा बसेको विपद् जोखिम न्यूनीकरण तथा व्यवस्थापन कार्यकारी समितिको ३० औँ बैठकपछि सञ्चारकर्मीहरुसित प्रतिक्रिया दिँदै गृहमन्त्री लेखकले गत असोजमा भएको बाढी, पहिरो र डुबानबाट भएको क्षतिको आँकलन संकलन कार्य आगामी साताभित्रै सुरु गरिने जानकारी दिए ।

‘गत असोज महिनामा बागमती, कोशी लगायतका प्रदेश लगायतका अरु ठाउँमा अविरल बर्षाका कारणले बाढी, पहिरो डुवानले जुन क्षति भएको थियो, अब तत्काल त्यसको क्षतिको विस्तृत क्षति आँकलन अघि बढाउने विषयमा छलफल भएको छ,’ गृहमन्त्री लेखकले भने, ‘निजी आवासहरु अस्थायी बनाउने ठाउँमा अस्थायी र स्थायी बनाउने ठाउँमा स्थायी आवास बनाउने गरी अघि बढ्छौं ।’

उनले बैठकमा आगामी दिनमा विपद्बाट हुने सक्ने सबै खालका जोखिम नियन्त्रणका लागि तयार रहदै आगामी दिनमा तयारीका साथ अघि बढ्ने विषयमा छलफल भएको छ बताए ।

‘यसअघिको बैठकले पश्चिम नेपालको भूकम्प (डोटी अछाम र जाजरकोट) विस्तृत क्षति आकँलन नभएको ठाउँमा क्षति आँकलन गर्ने, क्षति आँकलन भएको ठाउँमा नीजि स्थायी आवास निर्माणको कार्य अघि बढाउने निर्णय गरेका थियौँ,’ लेखकले भने, ‘पश्चिम नेपालको भूकम्पका बारेमा काम गर्नका लागि तीन वटा कार्यालय पनि म आफै गएर स्थापना गरेका छु, आजको बैठकमा त्यसका बारेमा जानकारी लिने काम भयो । पश्चिम नेपाल भूकम्पबाट उत्पन्न पीडा क्षति आँकलन गर्न बाँकी रहेको ठाउँमा विस्तृत क्षति आँकलन कार्य पनि दु्रत गतिमा अघि बढेको छ ।’

मन्त्री लेखकले क्षति आँकलन भएको ठाउँमा स्थायी आवास निर्माणको कार्य पनि अघि बढेको जानकारी दिए ।

‘जाजरकोटमा पनि पुर्ननिर्माण र पुर्नस्थापनको काम अघि बढेको छ । यहाँबाट अनुदान पठाउने काम प्रारम्भ भएको छ,’ उनले भने, ‘डेढ दुई बर्षदेखि रोकिएको काम अहिले अगाडी बढ्यो । त्यसका बारेमा पनि समीक्षा भयो ।’

बैठकमा स्वास्थ्य तथा जनसंख्या मन्त्री प्रदीप पौडेल, गृहसचिव गोकर्णमणि दुवाडी लगायत उच्च पदस्थ अधिकारीहरुको सहभागिता रहेको थियो ।