बैंकिङ कसुर मुद्दाका फरार प्रतिवादी पक्राउ

काठमाडौं । बैंकिङ कसुर मुद्दाका फरार प्रतिवादीलाई प्रहरीले  पक्राउ गरेको छ । 

  पक्राउ पर्नेमा  सिन्धुपाल्चोक बलेफी गाउँपालिका–७ घर भई काठमाडौं महानगरपालिका–२९ कालिकास्थान बस्ने ४७ वर्षीया लैला कुमारी गहतराज रहेकी छन् । 

जिल्ला अदालत काठमाडौंबाट बैंकिङ कसुर मुद्दामा पक्राउ पुर्जी जारी भई फरार रहेकी उनलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले काठमाडौं महानगरपालिका–२९ कालिकास्थानबाट शुक्रबार दिउँसो पक्राउ गरेको हो । 

उनलाई आवश्यक अनुसन्धान एवम् कारबाहीको लागि प्रहरी वृत्त महाराजगंज पठाइएको  प्रहरीले जनाएको छ ।