काठमाडौं । उपप्रधानमन्त्री एवं अर्थमन्त्री विष्णु पौडेलले राजतन्त्रले शिर उठाउनु शमसानघाटबाट मुर्दालाई ब्युँताउने कोशिस गरेको टिप्पणी गरेका छन् ।
आइतबार काठमाडौंमा आयोजित एक कार्यक्रममा बोल्दै मन्त्री पौडेलले नेपालमा फेरि राजतन्त्र कहिल्यै शासनसत्तामा आउन नसक्ने बताएका हुन् ।
राजतन्त्रले आफ्नो औचित्यमाथि प्रश्न खडा गरेका कारण नेपाली समाजबाट सदाका लागि बिदा भएर गएको उनको भनाइ छ । उनले राजतन्त्रको विद्रुप अनुहार गत शुक्रवार सडकमा देखिएको टिप्पणी गरे । उक्त आन्दोलनले राजावादीहरू हिंसा, आतंक, लुटपाट र नागरिकको मौलिक हकको विरुद्धमा रहेको देखिएको बताए । उनले गणतन्त्रवादी दलहरूलाई जनताको बलमा स्थापितसंघीय लोकतान्त्रिक गणतन्त्र लाई बलियो बनाएर अघि बढ्ने अभिभारा रहेको बताए ।
उनले भने, ‘समाप्त भएको राजतन्त्र जसरी आज शिर उठाउने कोशिस गर्दै छ यो वास्तवमा शमसानघाटबाट मुर्दालाई ब्युँताउने कोशिस जस्तै हो । नेपालमा राजतन्त्र कहिल्यै पनि फर्कन सक्दैन । नेपालमा राजतन्त्र कहिल्यै पनि शासनसत्तामा आउन सक्दैन । यो कुरामा हामीले कुनै पनि दुविधा राख्नु हुँदैन । जहाँसम्म राजतन्त्रवादीहरूको कुरा छ । राजतन्त्रका हिमायतीहरूको कुरा छ । उनीहरूको वास्तविक चरित्र के हो २ दिन अघिको घटनामा प्रकट भएको छ । राजतन्त्रको विद्रुप अनुहार सडकमा देखिएको छ । राजतन्त्रवादीहरू हिंसाका पक्षमा छन्, आतंकको पक्षमा छन्, राजतन्त्रवादीहरू लुटपाटको पक्षमा छन् र राजतन्त्रवादीहरू नागरिकको मौलिक हकको विरुद्धमा छन् भन्ने देखिएको छ । त्यसकारण ले नेपाली जनता लुटतन्त्रको पक्षमा, हिंसाको पक्षमा, अधिनायकवादको पक्षमा कहिले पनि हुन सक्दैनन् भन्ने छर्लङ्ग छ । अहिले राजनीतिक दलहरूलाई जनताको बलमा स्थापित संघीय लोकतान्त्रिक गणतन्त्रलाई बलियो बनाएर लग्ने अभिभारा छ ।’
दलहरूले जनताका आवश्यकता र आकंक्षाहरुलाई ठिक ढंगले सम्बोधन गर्दै सबै प्रकारका विभेद र असमानताहरूलाई समाप्त पार्ने गरी अगाडि बढ्न जरुरी रहेको समेत बताए ।
यो खबर पढेर तपाईलाई कस्तो महसुस भयो ?
प्रतिक्रिया