काठमाडौं । चार दिनदेखि हराइरहेका सर्लाहीको चक्रघट्टा–८ घर भई काठमाडौं गोकर्णेश्वर बाहुनधारा बस्दै आएका १९ वर्षीय राहुल साहको शव भेटिएको छ ।
चैत ११ गतेदेखि हराइरहेका उनको शव चैत १५ गते माकलबारीमा सञ्चालित आरके मोटरसाइकल वर्कसपको पछाडिको जमिनमा गाडिएको अवस्थामा फेला परेको हो । जिल्ला प्रहरी परिसर काठमाडौंले सो घटनामा संलग्न ६ जनालाई पक्राउसमेत गरेको छ ।
जिल्ला प्रहरी परिसर काठमाडौंका एसपी तथा प्रवक्ता अपिलराज बोहोराका अनुसार, पक्राउ पर्नेहरूमा भारतको बिहार घर भई काठमाडौं दक्षिणढोका बस्ने २९ वर्षीय सुनिल शर्मा, सर्लाहीको चक्रघट्टा गाउँपालिका–१ घर भएका २२ वर्षीय निपु मण्डल, सोही गाउँपालिका–६ का १८ वर्षीय विजय यादव, सोही ठाउँका १८ वर्षकै करण कुमार महतो, सोही ठाउँका २३ वर्षीय जोधन मण्डल र ४५ वर्षीय उत्तम मण्डल छन् ।
प्रहरीका अनुसार निपु र जोधन गोकर्णेश्वर–५ मा र सुनिल काठमाडौंको दक्षिणढोकामा बस्दै आएका थिए । लेनदेनका विषयमा राहुलको हत्या गरिएको प्रारम्भिक अनुसन्धानका क्रममा पत्ता लागेको प्रहरीले जनाएको छ ।
उनीहरूविरुद्ध अनुसन्धान गर्न काठमाडौं जिल्ला अदालतबाट पाँच दिन म्याद प्राप्त भएको परिसरका एसपी अपिलराज बोहराले जानकारी दिए ।
यो खबर पढेर तपाईलाई कस्तो महसुस भयो ?
प्रतिक्रिया