संसदमा ओली बोल्दा राप्रपाको अवरोध, तीनकुने घटनाका दोषीलाई कारबाहीको दायरामा ल्याइने भनाइ

काठमाडौं । प्रधानमन्त्री केपी शर्मा ओलीले संसद्मा सम्बोधन गरिरहेका बेला राष्ट्रिय प्रजातन्त्र पार्टी (राप्रपा)का सांसदहरूले अवरोध गरेका छन् ।

प्रधानमन्त्री ओलीले शुक्रबारको घटनालाई लिएर पूर्वराजाका विषयमा बोलेपछि राप्रपा सांसदहरूले उठेर नियमावलीको प्रश्न उठाउँदै होहल्ला गरेका हुन् ।

उनीहरूले अवरोध र होहल्ला गरेपछि प्रधानमन्त्री ओलीले आक्रोशित भावमा संविधान नमान्नेहरूले नियमावलीका विषयमा प्रश्न उठाउन आवश्यक नभएको बताए । उनले संविधान उल्लंघनका विषयमा आफूले प्रश्न उठाइरहेको बताए ।

प्रधानमन्त्री ओलीले तीनकुने घटनामा संलग्न जोसुकै भए पनि कारबाहीको दायरामा ल्याउनेसमेत बताएका छन् । उनले उक्त दिन घटेका सबै गतिविधि निन्दनीय र खेदजनक भएको जिकिरसमेत गरे । ‘यी सबै निन्दनीय र खेदजनक कार्य हुन्,’ प्रधानमन्त्री ओलीले भनेका छन्, ‘यस्ता घटनामा संलग्नमाथि जुनसुकै तवरमा किन नहुन्, कडा प्रशासनिक कारबाही हुन्छ ।’