प्रधानमन्त्री ओलीले संसदमा भने : पूर्वराजा ज्ञानेन्द्र शाहलाई  पनि उन्मुक्ति दिइँदैन 

काठमाडौं । प्रधानमन्त्री केपी शर्मा ओलीले गत शुक्रबार काठमाडौंको तीनकुनेमा भएको आपराधिक घटनामा संलग्न कसैले पनि उन्मुक्ति नपाउने भन्दै आपराधिक घटनामा संलग्न भएको खण्डमा पूर्वराजा ज्ञानेन्द्र शाहले पनि उन्मुक्ति नपाउने बताएका छन् ।

सोमबार प्रतिनिधिसभाको बैठकको सुरुवातमै सम्बोधन गर्दै प्रधानमन्त्री ओलीले इतिहासको कुनामा फ्याँकिसकेको व्यक्तिसँग सामेल भएर घटाइएको हिंस्रक घटनामा संलग्न जोसुकैमाथि कडा प्रशासनिक कारबाही हुने बताए । गत शुक्रबारको घटनाका सम्बन्धमा गृह मन्त्रालयबाट छानबिन भइरहेको र विस्तृत विवरण आउने उनले बताए । सम्बोधनकै क्रममा उनले एक वर्षदेखि संविधान र सरकारमाथि बारम्बार प्रहार समेत भएको बताए ।