दुई तिहाईको सरकारले मलाई ज्यूँदै छाडेको छ, यही नै मेरो जित हो : रवि लामिछाने

काठमाडौं । राष्ट्रिय स्वतन्त्र पार्टीका सभापति रवि लामिछानेले आफू लुटतन्त्रको विरुद्धमा निरन्तर उभिने बताएका छन् ।

५ महिनापछि सभापतिको जिम्मेवारीमा फर्किएपछि केन्द्रीय कार्यालय घण्टीघरमा आयोजित पत्रकार सम्मेलनमा बोल्दै पूर्व उपप्रधानमन्त्री समेत रहेका लामिछानेले सो कुरा बताए ।

त्यस्तै आफूमाथि सहकारी ठगीको आरोपमा लगाइएको मुद्दाको प्रारम्भिक फैसलालाई समेत नेताहरुले अपब्याख्या गरेर बोल्ने गरेको भन्दै कटाक्ष गरे ।

केहीकेहीले अलिकति केही नभएको भए तलाई अदालतले त्यत्रो धरौटी लिन्थ्यो त ? भनिरहेका छन् । अदालतको प्रारम्भिक आदेशलाई समेत अपमान र अपब्याख्या गरिरहेको मैले सुनिरहेको छु । म यति भन्न चाहान्छु, तिमीहरुको दुई तिहाईको सरकारले मलाई ज्यूँदै छाडेको छ यही नै मेरो जित हो,’ उनले भने, ‘शरीरमा दुई थोपा रगत रहुन्जेलसम्म यो लुटतन्त्रको विरोधमा उभिनेछु । चाहे जति वटा मुद्दा लगाउनुछ लगाउ, ज्यान मार्नुछ मार । मैले मेरो व्यक्तिगत जीवनका लागि केही मागेको छैन ।’

गत कार्तिक २ गते लामिछानेलाई सहकारी ठगी प्रकरणमा पार्टी कार्यालय घण्टीघरबाट पक्राउ गरिएपछि उनी सभापतिको जिम्मेवारीमा थिएनन् । आजबाट पुनः जिम्मेवारीमा फर्किएपछि उनको स्वागतका लागि समर्थकहरु घण्टीघर पुगेका थिए ।

त्यस्तै उनले कार्यक्रमलाई सम्बोधन गर्दै आफू राजनीतिमा नभएको भए यो दुःख खेप्न समेत नपर्ने दाबी गरे ।

त्यस्तै वर्तमान अवस्थामा संघीय लोकतान्त्रिक गणतन्त्रको आडमा लुटतन्त्र मच्याइएको भन्दै त्यसको विरुद्धमा लड्न आफू कहिले पनि पछि नपर्ने बताए ।