काठमाडौं । पूर्व प्रधानमन्त्री एवं नेपाली कांग्रेसका सभापति शेरबहादुर देउवा प्रतिनिधि सभाका धेरै बैठकहरुमा निरन्तर अनुपस्थित रहने गरेको पाइएको छ ।
पार्टीको कार्यक्रममा व्यस्त रहेको कारण खुलाउँदै देउवा निरन्तर संसद् बैठकमा अनुपस्थित भएका हुन् ।
आज सभामुख देवराज घिमिरेले निरन्तर १० वा सो भन्दा बढी बैठकमा अनुपस्थित हुने सांसदहरुबारे सदनलाई जानकारी गराएका हुन् । सभामुख घिमिरेका अनुसार गत फागुन २२ गतेबाट चैत १७ गतेसम्म गरी देउवा यसबीचका ११ वटा बैठकमा अनुपस्थित भएका हुन् ।
‘माननीय शेरबहादुर देउवा, मिति ०८१/११/२२ देखि मिति ०८१/१२/२७ सम्म । कारण पार्टीको कार्यक्रममा व्यस्त रहनुपरेकाले,’ सभामुख घिमिरेले भनेका छन् ।
त्यस्तै मनोरमा शेरचन, लिलादेवी बोखिम लिम्बू, सरस्वती बजिमय, रमेश रिजाल, दीपक बोहरा (आज निधन भएका), शेरबहादुर देउवा, गीता बस्नेत (सहकारी ठगीमा पक्राउ पुर्जी जारीपछि फरार) लगायतका प्रतिनिधि सभा सदस्यहरु निरन्तर सदनमा उपस्थित हुन नसकेका हुन् ।
त्यस्तै आजको संसद् बैठकले बिदासम्बन्धी प्रस्ताव स्वीकृत गरेको छ ।
साथै आज गृहमन्त्री रमेश लेखकले समेत बोल्न समय माग गरेका थिए । तर प्रतिनिधि सभा सदस्य दिपक बोहराको निधनपछि निर्धातिर सबै कार्यसूची अनुसार बैठक नबसी शोक प्रस्ताव पारित गर्र्दै बैठक सकिएको हो ।
त्यस्तै आज राति १२ बजेबाट संसद्को हिउँदे अधिवेशन समेत अन्त्य भएको छ ।
यो खबर पढेर तपाईलाई कस्तो महसुस भयो ?
प्रतिक्रिया