इजरायली आक्रमणबाट गाजामा २४ घण्टामा ९७ प्यालेस्टिनीको मृत्यु

एजेन्सी । गाजा पट्टीमा इजरायली आक्रमण जारी रहँदा पछिल्लो २४ घण्टामा कम्तिमा ९७ प्यालेस्टिनीहरू मारिएका छन् भने १३८ जना घाइते भएका छन् । स्वास्थ्य अधिकारीहरूले धेरै पीडितहरू भग्नावशेष र सडकमा फसेका कारण उद्धार कार्य कठिन भएको बताएका छन्। एम्बुलेन्स तथा नागरिक सुरक्षा टोलीहरू घटनास्थलमा पुग्न असमर्थ भइरहेका छन् ।

मार्च १८ देखि इजरायलले गाजापट्टीमा आफ्नो तीव्र आक्रमणहरू पुनः तीव्र पार्दा हालसम्म १ हजार १६३ प्यालेस्टिनीहरूले ज्यान गुमाएका छन् भने २ हजार ७३५ जना घाइते भएका छन् । स्वास्थ्य अधिकारीहरूका अनुसार गाजाका अस्पताल तथा स्वास्थ्य केन्द्रहरू औषधि, चिकित्सा आपूर्ति र इन्धन अभावका कारण अत्यधिक दबाबमा सञ्चालन भइरहेका छन् ।

स्वास्थ्य संकटका कारण हजारौं बिरामी तथा घाइतेहरूको उपचारमा कठिनाइ भइरहेको छ। विशेष गरी बालबालिका, गर्भवती महिला र वृद्धहरूको जीवन जोखिममा परेको बताइएको छ। अन्तर्राष्ट्रिय समुदायले स्वास्थ्य क्षेत्रका लागि आपत्कालीन सहायता उपलब्ध गराउन पहल गर्नुपर्ने आवाज उठ्न थालेको छ।