सुरेश रजकको घटनाबारे सशस्त्रका आईजीपी भन्छन्– ‘मान्छे छ भन्ने थाहा नै भएन’

काठमाडौं । सशस्त्र प्रहरीका महानिरीक्षक (आईजीपी) राजु अर्यालले तीनकुने घटनामा आगोले जलेर मृत्यु भएका पत्रकार सुरेश रजकबारे सुरुमा आफूहरुलाई थाहा नै नभएको बताएका छन् ।

शुक्रबार बसेको प्रतिनिधि सभा अन्तर्गतको राज्य व्यवस्था तथा सुशासन समितिको बैठकमा बोल्दै आईजीपी अर्यालले सो कुरा बताए ।

उनले सशस्त्र प्रहरी बलबाट फिल्डमा खटिएकाहरु पटकपटक आगो लागेको मार्बल हाउसको तेस्रो तलामा पुगेको समेत दाबी गरे । तर चौथो तलामा ताला लगाइएकाले आफूहरुलाई त्यहाँ मान्छे छ भन्ने नै थाहा नभएको तर्क अर्यालको रहेको छ ।

‘आगलागी भएको भवनको ३ तलासम्म पुग्दा चौथो तलामा ताला लगाइएको रहेछ । धेरै पटक पुग्दा पनि भेटिएन । दमकलमा नै आगो लगाउने प्रयास गर्दा समस्या भयो । भित्र मान्छे छ भन्ने आशा गरिएन । तल आउँदा पनि निस्सासिएको अवस्था थियो । मृत्यु भएको शव निकाल्न त जोखिम मोलेर गरिने गरेको छ भने जीवित छ भन्ने थाहा भएको भए उद्धारमा नजाने भन्ने कुरै हुँदैन,’ उनले भने ।

तर फिल्डमा खटिएका सञ्चारकर्मीहरुका अनुसार भने पटकपटक सशस्त्र प्रहरीलाई आगो निभाउनका लागि आग्रह गरे पनि असहयोग गरेको आरोप लगाएका छन् ।

तीनकुने घटनापछि जनताको जीउधनको सुरक्षामा प्रहरी चुकेको आरोप लागेको छ । यता अर्यालले भने प्रहरी संगठनलाई साधनस्रोतको अभाव रहेको दाबी गरे ।

‘प्रहरी संगठनलाई साधनस्रोत अभाव छ । यसै समितिबाट निर्देशन सरकारलाई गयो भने बरु हामी सूची बुझाउँछौ,’ उनले भने ।

त्यस्तै उक्त प्रदर्शनको मुख्य कमाण्डर दुर्गा प्रसाईँ कार्यक्रमस्थलतर्फ नगएर प्रहरीको सुरक्षा घेरा तोड्न गएकाले अवस्था अनियन्त्रित बन्न पुगेको बताए ।
साथै आफूहरुले तीनकुने घटनामा थोरै बल प्रयोग गरेको समेत दाबी गरे । त्यस्तै प्रहरीले भीड नियन्त्रणका लागि थोरै बल प्रयोग गरे पनि प्रश्न उठ्ने र धेरै बल प्रयोग गरे पनि प्रश्न उठ्ने अवस्था रहेको टिप्पणी गरे ।

‘सुरुमा नै सभास्थलमा नगएर प्रहरीकोमा आएपछि तलमाथि भएको हो । सुरक्षा फौजले न्यून क्षतिमा गरेको हो । बल प्रयोग आवश्यकताका आधारमा भएको छ । यस्तो अवस्थामा प्रश्न उठ्न जरुरी छ । कम क्षतिमा काम गर्ने प्रयास गरेका छौं । ग्याँस गन लुटिएको छ । सुरक्षा निकायका घाइतेलाई पनि अस्पताल पुर्‍याउन अवरोध भएको थियो । ३ देखि ४ घण्टामा स्थिति नियन्त्रणमा लिएका थियौँ,’ उनले भने, ‘सुरक्षाको बारेमा कम बल प्रयोग गर्दा र बढी प्रयोग गर्दा पनि प्रश्न उठ्छ । सुरक्षामा कमजोरी भयो भने भित्र मिलाउनुपर्छ । बाहिर गयो भने राष्ट्रिय सुरक्षामा असर गर्छ ।’

यता नेपाल प्रहरीका प्रमुख दिपक थापाले पनि आफूहरुले कम बल प्रयोग गरेरै अवस्थालाई नियन्त्रणमा लिएको दाबी गरेका छन् ।