राप्रपा अध्यक्ष लिङदेनको आरोप : ‘प्रहरी प्रमुख थापा युवा संघको सहअध्यक्ष रहेछन्’

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले प्रहरी प्रमुख आईजीपी दीपक थापा सत्तारुढ दल नेकपा एमालेकाे भ्रातृ संगठन युवा संघको सहअध्यक्ष भएको गम्भीर आरोप लगाएका छन् । 

मंगलबार काठमाडौंको बल्खुमा पार्टीले आयोजना गरेको आमसभालाई सम्बोधन गर्दै अध्यक्ष लिङदेनले यस्तो आरोप लगाएका हुन् ।  

उनले गत चैत १५ गते काठमाडौंको तीनकुनेमा भएको घटनाको जिम्मेवार प्रधानमन्त्री, गृहमन्त्री र प्रहरी प्रमुख  रहेको टिप्पणी गरे ।  उनले प्रहरीले नै म्याद नाघेको अश्रुग्याँस प्रहार गरेको आरोप समेत लगाए । अनि दुर्गा प्रसाईँले ल्याएर हान्यो म्याद गुज्रेको अश्रुग्याँस ? उनको प्रश्न थियो ।

उनले भने, ‘त्यो दिन (चैत १५ मा) जसरी राज्यले हिंसा भड्कायो मा होइन दुई दर्जनभन्दा बढी मानिसलाई गोली लाग्यो । दुई जनाको ज्यान गयो । कयौँ घाइते भए । त्यसको कुनै हिसाब छैन । भौतिक क्षतिको समेत कुनै हिसाब छैन । तर त्यसको मुलम्मा अहिलेको राज्यसत्ता, अहिलेका प्रधानमन्त्री, अहिलेका गृहमन्त्री र अहिलेको प्रहरीको नाइके प्रहरी प्रमुख जिम्मेवार छन् । गृहमन्त्रीले आदेश दिए होलान्, प्रहरी चले होलान् भनेको त अहिलेको प्रहरी प्रमुख त एमालेको युवा संघको सहअध्यक्ष पो रहेछ । प्रहरीले हानेको अश्रुग्याँसको एक्सपाइरी डेट, २००८,२०१०,२०१२ छ । त्यो गुर्दा प्रसाईँले हानेको अश्रुग्याँस हो ? अनि त्यो प्रहरी प्रमुख एमालेको प्रतिनिधि भएर निर्लज्जतापूर्वक भन्छ–हामीले हानेको अश्रुग्याँस कसरी डेट एक्सपाइर हुनसक्छ ।  प्रहरी प्रहरी नै भएर बस्नुपर्छ  कुनै राजनीतिक दलको भातृ संगठन भएर होइन ।’

उनले देश गणतन्त्रवादीहरूको मात्र नभई राजा आउनुपर्छ भन्नेहरूको समेत भएको कारण अफवाह फैलाउने काम नगर्न सञ्चार गृहहरूलाई आग्रह गरे ।