अब भू-उपग्रह माध्यम प्रयोग गरी नेपालको कृषिक्षेत्रको पहिचान गरिने

काठमाडौं । उद्योग वाणिज्य तथा आपूर्ति मन्त्री दामोदर भण्डारीको प्रमुख आतिथ्य र नेपाल मैदा उद्योग संघका अध्यक्ष कुमुद दुगडको सभापतित्वमा नेपाल मैदा उद्योग संघको २४ औँ वार्षिक साधारण सभा सम्पन्न भएको छ । 

सो अवसरमा मन्त्री भण्डारीको उपस्थितिमा नेपाल मैदा उद्योग संघ र भारतको ‘एग्रिवाच’ कम्पनीबिच कृषि क्षेत्रमा सूचना प्रवाह, विश्लेषण र परामर्श सेवाहरू प्रदान गर्नका लागि सम्झौता पत्रमा हस्ताक्षर भएको थियो । 

भू-उपग्रह (स्याटलाइट) माध्यम प्रयोग गरी नेपालको कृषि क्षेत्रको पहिचान गर्न निजी क्षेत्रको प्रयासमा पहिलो पटक यो सम्झौता भएको हो । 

साथै यस कार्यक्रमको अर्को प्रमुख उपलब्धि भनेको भारत सरकारको राष्ट्रिय सहकारी निर्यात लिमिटेडका प्रबन्ध निर्देशक उनुपम कौशिकको उपस्थिति रह्यो । भारत सरकारले कृषि क्षेत्रको प्रवर्द्धन र कोटा निर्यातलगायत कृषिसँग सम्बन्धित विषयमा भारत सरकारको राष्ट्रिय सहकारी निर्यात लिमिटेडलाई पूर्ण अधिकार प्रत्यायोजन गर्ने हुँदा भारतको औद्योगिक वस्तु निर्यातमा यसको ठूलो हात रहेको छ । भारतले नेपाललाई दिएको २ लाख टन गहुँलगायत विगतमा चिनीलगायतका खाद्यान्न नेपाल आयात गर्दा राष्ट्रिय सहकारी निर्यात लिमिटेड मार्फत नै आयात गरिएको थियो । भारतको राष्ट्रिय सहकारी निर्यात लिमिटेड र नेपालको सम्बन्धमा अझ प्रगाढ ल्याउने उद्देश्य अनुरूप प्रबन्ध निर्देशकलाई संघको विशेष अनुरोधमा नेपाल आमन्त्रण गरिएको हो । 

साथै सभामा नेपालकै जेठो मैदा उद्योग खाद्य उद्योग लिमिटेड र संघको संस्थापक अध्यक्ष रवीन्द्रबहादुर श्रेष्ठलाई दोसल्ला ओढाई सम्मान गरिएको थियो । 

यस सम्झौताबाट नेपालले लिन सक्ने फाइदाहरू 

कृषि बजार सूचना र विश्लेषण :  नेपालको कृषि वस्तुहरूको मूल्य संकलन गर्छ । यसले दैनिक, साप्ताहिक र मासिक रिपोर्टहरू मार्फत बजार विश्लेषण गर्न मद्दत पुग्छ । यसले कृषक र व्यापारीलाई निर्णय लिन सहयोग पुर्‍याउँछ ।

कृषि वस्तु अनुसन्धान र परामर्श : कम्पनीले कृषि वस्तुहरूको अनुसन्धान र परामर्श सेवाहरू प्रदान गर्दछ, जसमा उत्पादन, उपभोग, आयात र निर्यात विश्लेषण र बजार प्रवृत्तिहरू समावेश छन् । 

कृषि निवेश अध्ययन र सल्लाह : बीउ, मल र अन्य कृषि निवेशको अध्ययन र सल्लाह प्रदान गर्दछ । कृषकहरूलाई उपयुक्त बाली छनोट गर्न मद्दत गर्दछ ।

डिजिटल कृषि समाधानहरू : डिजिटल कृषि समाधानहरू जस्तै एआई आधारित बाली विश्लेषण, व्यक्तिगत कृषि परामर्श र बजार जडान सेवाहरू प्रदान गरी कृषकहरूलाई आधुनिक प्रविधिको उपयोगमा सक्षम बनाउनका साथै देशको यथार्थ कृषि तथ्यांक निकाल्छ । जसले गर्दा नेपालमा कृषिको उत्पादन आयात निर्यात र भोलिको दिनमा नेपाल सरकारले अपनाउन पर्ने कृषि रणनीतिको बारेमा सहजीकरण गर्दछ ।  

कृषि समाचार र जानकारी : एग्रीवाचले कृषि सम्बन्धी ताजा समाचार, वस्तु मूल्यहरू, र बजार रिपोर्टहरू प्रकाशित गर्दछ, जसले कृषक र अन्य सरोकारवालाहरूलाई अद्यावधिक जानकारी प्रदान गर्दछ ।